Хорооллын эцсээс Гэмтлийн эмнэлгийн уулзвар хүртэлх 1 км авто замыг өргөтгөл, шинэчлэлийн ажлыг дуусгаж, замын хөдөлгөөнийг нээлээ

59

Баянгол дүүрэг, Хорооллын эцсээс  Гэмтлийн эмнэлгийн уулзвар хүртэлх  1 км авто замыг  өргөтгөл, шинэчлэлийн ажлыг дуусгаж,   замын хөдөлгөөнийг бүрэн нээлээ.

Энэхүү замыг өргөтгөн шинэчилснээр  замын хөдөлгөөний ачаалал буурч, иргэдийн аюулгүй ая тухтай зорчих нөхцөл сайжирч, зорчигч, тээвэрлэгчдийн цаг хугацаа болон шатахуун хэмнэх, ая тухтай байдлыг  бүрэн хангах боломжтой болоод байна.  Мөн тус замыг  Сонгинохайрхан дүүргийн 30,31 дүгээр хорооны чулуун замаар Орбит, Үйлдвэрчний эвлэлийн гудамжтай холбож байгаа юм.

Хорооллын эцсийн болон Гэмтлийн эмнэлэгийн баруун урд уулзварыг өргөтгөн шинэчилсэн ч 1987 онд ашиглалтад орсон тус авто замд шинэчлэл хийгдээгүй байсан юм. Шинэчлэлийн хүрээнд хуучин 2 эгнээ байсан авто замын зорчих хэсгийг тус бүр 9 метрийн өргөнтэй 3 эгнээ бүхий 2 урсгалтай болгон өргөтгөж, замын  2 талаар явган хүний зам, дугуйн замыг шинээр барьж, борооны ус зайлуулах  шугам, тэмдэг,  тэмдэглэгээ хийх ажлыг  “Наранбулаг Хан” ХХК гэрээт хугацаандаа  дуусгалаа.

Улаанбаатар хотыг 2020 он хүртэл хөгжүүлэх Ерөнхий төлөвлөгөөний тодотгол, “2030 оны хөгжлийн чиг хандлага” баримт бичигт замын хөдөлгөөний нэвтрүүлэх чадварыг дээшлүүлж, түгжрэлийг бууруулах зорилгоор гол гудамж, замуудад өргөтгөл шинэчлэлт хийж,  Нийслэлийн авто замын сүлжээг хөгжүүлэхээр тусгасан. Үүний  дагуу Нийслэлийн авто замын сангийн хөрөнгөөр энэ онд Баянгол дүүрэг, Хорооллын эцсээс  Гэмтлийн эмнэлгийн уулзвар хүртэлх  1км авто зам, Сонгинохайрхан дүүргийн 1-р хороо, Нарангийн авто замаас Орбитын авто зам хүртэлх 1.3 км авто зам, Налайх дүүргийн Дамдин, Даваажав, Найрамдлын зам гудамжны 1,5км авто зам, ХУД, Зайсангийн авто замаас Зайсан толгойн урдуур Богд уулын арын авто замтай холбогдох 2,4 км авто зам  гээд хэд хэдэн томоохон төслийг хэрэгжүүлж байна.